I tu te whakataetae nei ki Kirikiriroa, ki raro i te maru o Ngati Wairere. He tino whakataetae tenei i runga i te mohio e 61 nga ropu o te whakataetae nei, otira he whakaaturanga miharo o te hunga rangatahi e tu rangatira ana, e whakaatu ana i to ratou ihi, wehi, wana! He miharo te mātaki atu i te kounga o nga mahi e mahia ana e te taiohi, ka mau te wehi!

Ko nga kaihaka o to tatou nei kura i puta mai i nga rōpū a aunty Kororia, aunty Awatea me aunty Cathy, a, na Te Ahu Paenga raua ko Panapa Hawk te kapa i hautu i tenei tau. Ko te kaupapa hotaka i kawea e ratou ko tera e hangai ana ki te hekenga mai i Hawaiki, nga patupaiarehe o Ngongotaha, to tatou nei kura me te tiaki i te mana o nga tamariki. Me mihi nui ki nga kaiako me nga tamariki mo te ataahua rirerire o te whakaaturanga! I mahi nui ia tamaiti ki te whakatinana i nga kupu me nga kaupapa miharo o nga waiata nei.

I tino eke to tatou kapa i tenei tau, otira i eke ki te taumata tuatahi ki Te Reo, Te Moteatea, a, i tuarua to tatou kaitataki kohine a Te Ahu. Ka mutu, ko te turanga i riro i te kapa ko te tuangahuru.