Ka whai a Ruamata i te kawenata o nga kura kaupapa Maori a Te Aho Matua. He kaupapa whai tikanga, tuturu onamata. Kia tu maia, tu pakari, tu tangata, tu rangatira te tamaiti Maori i tenei ao. Ko ta Te Aho Matua; "He kakano te tamaiti i ruia mai i Rangiatea. I te whakairatanga ka hono, ka tipu ngatahi te wairua me te tinana i te kopu o te whaea, a, whanau noa. Me tipu ora tona katoa. Me tipu tona mana, kia ita tona mauri, kia puawai waiora te hauora. Kia rangona tona ihi, tona wehi, tona tapu, kia tu pakari, tu rangatira, hei raukura mo tona iwi."

Ko ta te Kura Kaupapa Maori Aho Matua he kawe i nga tamariki ki tua o nga pakitara e wha o te 'karahe', ara, ki nga ngaherehere, nga roto, nga moutere, nga marae, nga pa, ki nga wahi katoa o te taiao. Kei reira ke nga akoranga me te ako tuturu. Me hangai ki te ao o te tamaiti. Ma te pa o te ringa, ma te whawha, ma te rongo a-tinana, a-ngakau, e puawai ai te ako.

I te 3 o Huitanguru 1987, ka whakatuwherahia e Tamati Wharehuia raua ko Minita Haaka Morgan te wharekura e kiia ai ko Te Kura o Ruamata. E toru rau tangata no Te Arawa whanui i tae atu ki Ruamata i taua ra pai huarere ki te tautoko i te kura me tona kaupapa, ara, te kaupapa Maori. Tekau ma tahi nga tamariki i timata i te ra tuatahi. Ko te kaiako tuatahi ko Tepora Kameta, he kuia no Ngati Rangiteaorere me Ngati Pikiao. Ko Cathy Dewes te tumuaki.